|
| ﴿1﴾ وَاللَّيْلِ إِذَا يَغْشَىٰ |
| ރޭގަނޑު އިރު ނިވައިކުރާހިނދު، އެ ރޭގަނޑު ގަންދެއްވަމެވެ. |
| ﴿2﴾ وَالنَّهَارِ إِذَا تَجَلَّىٰ |
| ދުވާލު ފާޅުވެ، އަލިވެއްޖެހިނދު، އެ ދުވާލު ގަންދެއްވަމެވެ. |
| ﴿3﴾ وَمَا خَلَقَ الذَّكَرَ وَالْأُنثَىٰ |
| އަދި ފިރިހެން، އަންހެން، ދެ ޖިންސު ހެއްދެވި ކަލާނގެ ގަންދެއްވަމެވެ. |
| ﴿4﴾ إِنَّ سَعْيَكُمْ لَشَتَّىٰ |
| ހަމަކަށަވަރުން، އެއުރެންގެ ޢަމަލުތައް ތަފާތުވެގެންވާކަން ކަށަވަރެވެ. |
| ﴿5﴾ فَأَمَّا مَنْ أَعْطَىٰ وَاتَّقَىٰ |
| ފަހެ (މުދަލުން) ހޭދަކޮށް (ﷲއަށް) ތަޤްވާވެރިވެ، އަދި އެންމެ ހެޔޮބަސް ތެދުކުރިމީހާ ދަންނާށެވެ! |
| ﴿6﴾ وَصَدَّقَ بِالْحُسْنَىٰ |
| ފަހެ (މުދަލުން) ހޭދަކޮށް (ﷲއަށް) ތަޤްވާވެރިވެ، އަދި އެންމެ ހެޔޮބަސް ތެދުކުރިމީހާ ދަންނާށެވެ! |
| ﴿7﴾ فَسَنُيَسِّرُهُ لِلْيُسْرَىٰ |
| ފަހެ، ތިމަންރަސްކަލާނގެ ފަސޭހަކަން ހުރިމަގަށް އެމީހަކަށް މަގު ފަހިކޮށްދެއްވާ ހުށީމެވެ. |
| ﴿8﴾ وَأَمَّا مَن بَخِلَ وَاسْتَغْنَىٰ |
| އަދި ދަހިވެތިވެ، ﷲ ފިޔަވައި އަމިއްލަޔަށް ފުދިގެންކަމަށްހީކޮށް، އަދި އެންމެ ހެޔޮބަސް ދޮގުކުރިމީހާ ދަންނާށެވެ! |
| ﴿9﴾ وَكَذَّبَ بِالْحُسْنَىٰ |
| އަދި ދަހިވެތިވެ، ﷲ ފިޔަވައި އަމިއްލަޔަށް ފުދިގެންކަމަށްހީކޮށް، އަދި އެންމެ ހެޔޮބަސް ދޮގުކުރިމީހާ ދަންނާށެވެ! |
| ﴿10﴾ فَسَنُيَسِّرُهُ لِلْعُسْرَىٰ |
| ފަހެ، ތިމަންރަސްކަލާނގެ ދަތިކަންހުރި މަގަށް އެމީހަކަށް މަގު ފަހިކޮށްދެއްވާ ހުށީމެވެ. |
| ﴿11﴾ وَمَا يُغْنِي عَنْهُ مَالُهُ إِذَا تَرَدَّىٰ |
| އަދި އެމީހާ (ނަރަކަޔަށް) ވެއްޓޭހިނދު، އެމީހާގެ މުދާ އެމީހާޔަށް އެއްވެސްކަމެއް ފުއްދައެއް ނުދޭނެތެވެ. |
| ﴿12﴾ إِنَّ عَلَيْنَا لَلْهُدَىٰ |
| ހަމަކަށަވަރުން، ތެދުމަގު ދެއްކެވުންވަނީ، ތިމަންރަސްކަލާނގެއަށްކަން ކަށަވަރެވެ. |
| ﴿13﴾ وَإِنَّ لَنَا لَلْآخِرَةَ وَالْأُولَىٰ |
| އަދި ހަމަކަށަވަރުން، އާޚިރަތާއި، ދުނިޔޭގެ ހުރިހާކަމެއް މިލްކުވެގެންވަނީ، ތިމަންރަސްކަލާނގެއަށްކަން ކަށަވަރެވެ. |
| ﴿14﴾ فَأَنذَرْتُكُمْ نَارًا تَلَظَّىٰ |
| ފަހެ، އަނދައަނދާހުރި ނަރަކައިގެ ވާހަކައިން، ތިމަންރަސްކަލާނގެ ތިޔަބައިމީހުންނަށް އިންޛާރު ކުރެއްވީމެވެ. |
| ﴿15﴾ لَا يَصْلَاهَا إِلَّا الْأَشْقَى |
| ބޮޑުވެގެންވާ އަބާއްޖަވެރިޔަކު މެނުވީ، އެ ނަރަކަޔަކަށް ނުވަންނާނެތެވެ. |
| ﴿16﴾ الَّذِي كَذَّبَ وَتَوَلَّىٰ |
| އެމީހަކީ، ދޮގުކޮށް، އަދި އެނބުރި ފުރަގަސްދިން މީހާއެވެ. |
| ﴿17﴾ وَسَيُجَنَّبُهَا الْأَتْقَى |
| އަދި ތަޤްވާވެރިކަން ބޮޑުމީހާ، އެ ނަރަކަޔާ ދުރުކުރައްވާނެތެވެ. |
| ﴿18﴾ الَّذِي يُؤْتِي مَالَهُ يَتَزَكَّىٰ |
| އެމީހާއީ، އެމީހާ ޠާހިރު ވެގަތުމަށްޓަކައި، އޭނާގެ މުދާ ހޭދަކުރާ މީހާއެވެ. |
| ﴿19﴾ وَمَا لِأَحَدٍ عِندَهُ مِن نِّعْمَةٍ تُجْزَىٰ |
| އެހެންމީހެއްގެ ފަރާތުން އޭނާޔަށް ލިބޭނެ ހެޔޮކަމެއްގެ ބަދަލުގައެއް ނޫނެވެ. |
| ﴿20﴾ إِلَّا ابْتِغَاءَ وَجْهِ رَبِّهِ الْأَعْلَىٰ |
| އެހެނެއްކަމަކު (އޭނާ ހޭދަކުރަނީ) އޭނާގެ ވެރި، މަތިވެރިވަންތަ ރަސްކަލާނގެ ވަޖްހުފުޅު އަދައިގެންނެވެ. |
| ﴿21﴾ وَلَسَوْفَ يَرْضَىٰ |
| އަދި ނިކަންހުރެ އޭނާ ރުހޭނެކަން ކަށަވަރެވެ. |
|
